Metersacker amtetea Ozil

MWACHENI jamani. Nadhani amechoka. Mjerumani mmoja amemtetea Mjerumani mwenzake katika kambi ya Arsenal baada ya maji kuzidi unga pale Emirates.

Per Metersacker, beki mrefu na nguzo ya Arsenal, amemtetea kiungo mshambuliaji wa timu hiyo, Mesut Ozil, ambaye alikosa penalti katika pambano dhidi ya Bayern Munich la Ligi ya Mabingwa Ulaya huku pia akionekana kuwa katika kiwango kibovu katika maisha yake.

Arsenal ilichapwa mabao 2-0 na Bayern Munich huku Ozil aliyenunuliwa kwa Pauni 42 milioni kutoka Real Madrid katika kipindi cha majira ya joto kilichopita, akionekana kuwa katika kiwango dhaifu.

Hata hivyo, Metersacker anaamini kuwa Ozil inabidi apewe muda wa kuzoea soka la mabavu la Ligi Kuu England kwa ajili ya kuonyesha makali yake na hana shaka kuwa ataendelea kuwa staa wa timu hiyo.

“Tuna mechi nyingi hapa England na kila mmoja amechoka. Lakini sio lazima Mesut tu. Ni suala la kila mtu kumtia moyo na kumrudisha mchezoni. Wakati wa mechi tunahitaji kutiana moyo,” alisema Metersacker.

“Mesut amecheza mechi nyingi na ni bonge la mchezaji, tunamhitaji katika ubora wake. Mechi baada ya mechi atarudi kuwa imara. Sio kitu cha kawaida kuja hapa na kucheza katika kiwango cha juu katika msimu wa kwanza wenye mechi zaidi ya 50.

“Mesut ni muhimu kwetu na ni mchezaji mbunifu. Tunahitaji pasi zake za mwisho na mabao yake, kwa hiyo kitu muhimu ni kumtia moyo.”

Ozil alijikuta katika wakati mgumu mbele ya kiungo Mathieu Flamini ambaye alimzonga na kumkaripia wakati wa kipindi cha pili. Wakati huo Arsenal ilitakiwa kufanya kazi ngumu baada ya kuwa pungufu uwanjani baada ya kipa wao kutolewa.

Mertesacker anaamini kuwa suala hilo linaonyesha jinsi kikosi cha kocha Arsene Wenger kilivyo makini uwanjani.

“Ni vizuri kutiana moyo na inabidi tufanye vizuri kwa ajili ya timu, kuongea baina yetu ni kitu kizuri. Tunahitaji kila mtu uwanjani awe na akili nzuri. Mathieu anajaribu kumfanya kila mtu achangamke uwanjani. Ni vizuri kumwonyesha kila mtu kuwa uko tayari kupigana,” alisema.

Ozil alianza vema kipindi cha maisha yake ya soka Arsenal baada ya kuvunja rekodi ya uhamisho Emirates Septemba mwaka jana lakini ameonekana kudorora katika siku za karibuni huku akisababisha mabao mawili katika pambano dhidi Liverpool.

Source :Mwanaspot